Mínar kæru aspir

Í garðinum mínum eru nokkrar myndarlegar aspir.  Hafa væntanlega verið hér í 50 ár.  Í gærkveldi horfði ég á þær sveigjast tignarlega í góðri golu.  Í morgun voru greinar um allan garð og ein öspin ansi illa farin.  Ég er því búin að eyða úlfatímanum í að tína saman greinar í garðinum og gera hinn myndarlegasta köst.  Hugsa að ég kveiki nú samt ekkert í.  En það er deginum ljósara að öspin við hlið hússins verður að fara,- annars brýtur hún þakið í næstu norðanátt. 

Þá er bara að taka upp sögina.......

 

Öskubuska

 Öskubuska hefur ekki átt neina inneign í gsm-inn sinn og engin lög í I-potinn. Og ekki átt myndavél til að taka myndir af vondu stjúpsystrunum.  Þá er bara að bjarga sér. Ætli prinsinn finni hana að lokum ?  ( Hér má setja ??? við hvort Stefán Eiríksson sé prinsinn ).

Flottir skór sem myndskreyta fréttina !!!

Þjófurinn hljóp af sér skóna

Til tíðinda ;)

Það hefði nú verið saga til næsta bæjar í mínu ungdæmi ( gamla konan ekki enn búin að gleyma afmælinu í gær) að flutt væri frétt af slagsmálum á réttarballi.  Líklega hefði frekar þótt fréttnæmt ef ekki hefði komið til slagsmála.  Tvær tennur....hvað er það á milli vina.  Sendum unga manninn bara til tannlæknisins í Kjósinni/Nesinu ;)

Slagsmál á réttarballi

Frábært

Fyllti fjörutíuogþrjú ár í dag.  Þegar kona er orðin svona gömul en ekki grá ( var í litun fyrir helgi altsvo) þá er nú ekki verið að halda brjálað afmælispartý.  Í stað þess hélt ég ásamt Kolfreyju, Lúkasi, Ægi vini Lúkasar og Ingu mömmu hans í fjallgöngu.  Gengum á Súlur í fínu veðri ( fyrir utan rok á tindinum....var varla stætt) og þau sungu afmælissönginn fyrir mig á toppnum.  Það var náttúrulega toppur dagsins ;)

Sjáið tindinn.....þarna fór ég !!!

Elsku mamma

Mín kæra mamma hefði orðið 83 ára í dag. Þetta er fyrsti afmælisdagurinn eftir að hún féll frá í vor.  Er það fyrsta af öllu ekki alltaf erfiðast,- afmæli, jól, páskar o.s.frv.

Þessi mynd er tekin í september 1965.  Mamma fertug með mig nýfædda !!

Elda mömmumat í kveld henni til heiðurs ;)

Snyrtivörur !!

Blessuð konan hefur greinilega verið heilaþvegin af snyrtivöruframleiðendum ( eins og við alltof margar) og trúað því að hún hreinlega YRÐI að nota Dr. Hauschka hreinsimjólk,- amk hreinsimjólk yfir höfuð.  Eins og vatn sé ekki nógu gott ;)  Þetta hlýtur að hafa verið í lok maí og ellilífeyririnn uppurinn.  Segir þetta okkur ekki e-hvað um upphæð ellilífeyris ?  Ekki hefur blessuð konan neinn lífeyrissjóð að leita í þar sem hún er af þeirri kynslóð sem var heima og gætti bús og barna, síðan skildi karlinn við hana sextuga og hún sér ekkert af lífeyrnum hans .  Tóm eymd og volæði ( já, ég hef ríkt ímyndunarafl ).

En án gríns,- snyrtivöruframleiðendur hafa heilaþvegið alltof margar konur,- og eru núna reyndar að hasla sér völl í heilaþvotti á karlpeníngnum ( þetta í er vegna áhrifa Laxness sem ég les núna í massavís). Og líka án gríns,- þá eru alltof margar konur með alltof lág eftirlaun og engan lífeyri því þær unnu heima og borguðu því ekki í lífeyrissjóð.

Skilorðsbundið fangelsi fyrir að stela snyrtivöru

Næstum búið ;(

Og þá er ég næstum, næstum alveg búin að kveðja bernskuna mína.  Skrítið,- að kveðja hana þegar kona er hartnær 43 ára.  En mér líður samt þannig.  Við systurnar fjórar vorum í Hveragerði um helgina að klára að tæma húsið þeirra elskulegu mömmu og pabba.  Á meðan gekk Kristmundur á Digratind í góðu veðri.  Þannig að hann erfiðaði rétt eins og við.  Þetta var svona lokahnykkurinn og það kom hnykkur á hjartað mitt þegar borðstofuborðið fór úr húsinu og út á kerru á leið í Hafnarfjörðinn.  Þar eignast það nýtt og gott heimili hjá þriðju kynslóð. Þetta var samt svo endanlegt.   Borðstofuborðið var hjartað í húsinu, bæði á Kolfreyjustað og í Kambahrauninu. Við það hefur hið matelska Kolfreyjustaðarslekti etið marga góða máltíðina.  Ég veit reyndar fyrir víst að ég á eftir að eta fleiri góðar máltíðir við borðið hjá systur minni kærri í Hafnarfirðinum.

Í bílskúrnum kenndi síðan margt bóka,- og fleiri bóka,- og enn fleiri bóka.  Mynd af pabba datt líka úr einum kassanaum þegar við grandskoðuðum þá.  Hann var með okkur, og hefur haft gaman af.  Þetta var svona fjársjóðsleit og minnti mig á þegar við Steinvör fórum upp á háaloft á Kolfreyjustað og grandskoðuðum  kassa sem leyndust þar.  Þvílík gleði þegar fannst kassi með barnabókum frá eldri systrum ( já, nú ljóstra ég upp leyndarmáli.....við lásum þær allar og settum síðan á sinn stað.  Petra litla, Matta Maja og Björg hleypur að heiman).  Það voru líka fjársjóðir í kössunum núna, ljóðabækur, skáldsögur og enskir krimmar.

Húsið sjálft var kvatt, á eftir að koma í það aftur án efa.  En aldrei aftur á bernskuheimilið mitt.  það er kærlega kvatt, með miklum trega og söknuði. 

 

Auðvitað

Ég skora á viðsemjendur ljósmæðra að semja við þær strax.  Þetta er náttúrlega alveg skandall,- að fólkið sem tekur á móti nýjum Íslendingum sé vanmetið svona.  Hvurs virði er nám ?  Endalaust verið að flytja háfleygar ræður um mikilvægi menntunar,- en þessi mennun er nú ekki mikilvæg, í augum sumra greinilega. 

p.s. alveg er ég viss um að það væri löngu búið að semja um góð laun ef það væru karlar sem fæddu börnin !!

Fjölmenni á Austurvelli

Klukkið

Tek alltaf klukki,- eða tikken eins og sagt var í minni heimasveit ;)

Fjögur störf sem ég hef unnið um ævina:

• Hraðfrystihús Fáskrúðsfjarðar
• Kotjugenta á mf Norrönu
• Kennari....umsjónar og myndmennt ;)
• Skólastýra
  

Fjórar bíómyndir sem ég held upp á:

• La vita bella
• Notting Hill
• Með allt á hreinu
• Á hverfanda hveli

Fjórir staðir sem ég hef búið á

• Á Kolfreyjustað, Fáskrúðsfirði
• Á Blönduósi
• Í Þorlákshöfn
• Á Akureyri

Fjórir sjónvarpsþættir sem mér líkar:

• What about Brian
• Anna Phil
• Brothers and Sisters
• Beðmál í borginni

Fjórir staðir sem ég hef heimsótt í fríum:

• Krít
• París 
• Tossa de Mar....á Spáni
• Ásbyrgi.....og fullt af fallegum útilegustöðum á Íslandi

Fjórar síður sem ég skoða daglega fyrir utan blogg

• Mbl.is
• Facebook
• Belgingur.is
• Lundarskoli.akureyri.is

Fernt sem ég held upp á matarkyns:

• Hreindýr að hætti míns og eiginmannsins
• Gúrmet kjúklingaréttir,- rauði kjúllinn,- kjúlli og grænmeti, kjúllinn hennar Hrafnhildar, teryaki kjúlli......og...og...og
• Hvítlaukspizza m. maldon salti, parmasanosti,parmaskinku og klettasalati
• Soðin ýsa, nýjar kartöflur, smjör og þrumari
• Hvítlaukshumarinn hennar Ólínu......fetaostslaxinn hans Boga,- jólarjúpurnar........ég get eiginlega ekki hætt að telja upp hérna og er orðin alveg hrikalega svöng ;)

Fjórar bækur sem ég hef lesið oft og margar les ég oft....oft...oft

• Sjálfstætt fólk og Laxness yfir höfuð......
• Allar Lisu Marklund bækurnar
• Á hverfanda hveli,- held ég hafi nánast kunnað hana utanaf þegar ég var yngri, þarf að fara að lesa hana...........einu sinni enn....
• Henning Mankell,- ég er semsagt alveg sjúk í norræna krimma......

Fjórir bloggara sem ég klukka

• Sigga frænka í DK 
• Albert stórvinur...sem ég veit að tekur ekki þátt í svona leik ;) 
• Jóhanna Hauks
• Síra Baldur

 

Okur....

Það er alveg með ólíkindum verðið á flugi innanlands.  Og mikið þætti mér gaman að vita hvað koma mörg Spar-Bónus-Netsæti-Nettilboð-Sértilboð...sæti inn í hverja vél,- og í hve margar vélar á viku !! 

Ég er semsagt að fara suður,- að ljúka við að tæma í Hveró.  Hugmyndin var að ég tæki Kolfreyju með mér og Bogi yrði heima með Lúkas. ( Nota tímann í svona "bonding"). 

Og ég fór að bóka...á netinu.  Byrjaði meira að segja á þriðjudag,- en þá ættu nú tilboðin að vera til.  Í stuttu máli sagt,- engin tilboð, eingöngu til Forgangur ( 13.130 kr. önnur leið bara ég ),eða Ferðasæti ( 11.370 kr. önnur leið, bara ég).  5630 kostaði fyrir Kolfreyju.  Ég prófaði aftur og aftur,- þriðjudag,- miðvikudag og í dag.  Allt við hið sama.  Í dag prófaði ég að setja bara mig inn ( barnlausa) og viti konur ( og menn mega líka vita) þá kom upp Sparsæti,- kr.9730 ( önnur leið, bara ég).  Hmmm, þetta var nú e-hvað skrítið,- setti mig aftur inn með Kolfreyju og þá datt Sparsætið út.  En sniðugt,- græða á þeim sem eru að ferðast með börn,- ekki boðið upp á Sparsæti ef barn er í fylgd með þér !!  Gat ekki bókað mig eina í Sparsæti og síðan Kolfreyju, því það má ekki bóka börn ein,- og ef ég bóka hana með mér í gengum síma,-rúmlega 11000 kr. takk fyrir.

Nú er það bara ???? að aka suður eða fara ein í Sparsæti