Eins og gerst hafi í gær ;)

Að litla stúlkan mín fæddist.  Við Bogi höfðum fengið að vita kynið á barninu en þegar hún fæddist var samt það fyrsta sem ég sagði....en þetta örugglega stelpa ;)  Eins og drengirnir mínir lét hún bíða eftir sér, ég var skráð með hana 02.02.2000. en þessi sjálfstæða stelpa kom 19.02.2000.  Þá bjuggum við í Þorlákshöfn og ég fékk verki aðfararnótt 18.02. Við Bogi fórum um morguninn til R-víkur en á fæðingardeildinni vildu þær ekki sjá mig strax þannig að Þórhildur vinkona sá aumur á okkur og lánaði okkur íbúðina sína til að bíða.....og bíða...og bíða.  Fórum ekki á deildina aftur fyrr en um miðnætti og síðan kom Þórhildur líka og var viðstödd.  Það var nú heilmikið fjör hjá okkur með Jetro Tull og Santana í græjunum..........takk Þórhildur.  Besta fæðingin mín,- kunni alveg að anda glaðloftinu rétt og alles !!  Og kreisti út þessa 17 marka pæju með dökkan lubba ;)

Pínu myndasyrpa af hinni 9 ára snót....

 

Stundum...

...verð ég svo stressuð að ég verð svona Ragnar Reykhás og kem þá engu í verk.  Núna er þannig tími,- mikið að gera í vinnunni,- barnaafmæli á morgun og síðan ferðalag framundan.  Þá sit ég bara við tölvuna.  Haldiði að það sé gáfa ;)

Frábær helgi....

...að renna sitt skeið á enda. Vinir okkar þau Eva og Kári komu með tvillingana sína frá Blönduósi og dvöldu hér alla helgina. Á föstudagskveldið eldaði Bogi hinn frábæra kjúklingarétt Ragnars Reykhásar og við kjöftuðum frameftir. Dingluðum okkur svo dásamlega í bænum í gærdag og í gærkveldi gerði Eva pizzur og bakaðiómótstæðilega súkkulaðiköku. Elska svona gesti sem bjóða okkur í mat ;) . Krakkarnir okkar ná líka svo vel saman,- en tvillingarnir eru að verða 10 ára og stelpurnar er fínar saman ( enda Sólir báðar tvær) og strákarnir líka góðir vinir. Við fórum síðan á tónleika með stórsveitinni Baggalút í gærkveldi og það var bara gaman....og gaman....

Fimbulfrost....

Brrrr,- mér var svo kalt í nótt að ég vaknaði við glamrið í eigin tönnum,- skreiddist framúr og fann mér ullarbuxur og peysu og skreið upp í aftur og gekk illa að sofna.  Það þýddi náttúrulega bara eitt.....eftirmiðdegisblund eftir vinnu í dag, sem þýðir svo að ég sofna seint í kveld,- sem þýðir.....ekki neitt því ég sofna yfirleitt alltaf seint,- en er ekki vön að vakna glamrandi um miðjar nætur ;)

10 bækur....

segi og skrifa 10 bækur og þrjú blöð á og við náttborðið mitt ( við= á gólfinu).  Blöskraði svoldið í dag þegar ég var aðeins að snyrta til í svefnstað mínum.  Ætlaði að ganga frá nokkrum af þessum bókum,- en þær eru allar mislangt lesnar og allar ( næstum) langar mig að klára.  Ætli þetta segi nokkuð meira en annað um minn margklofna persónuleika.  Gat þó gengið frá tveimur blöðum, en það voru Andrésblöð eftir son minn eða dóttur. 

Bækurnar sem eru í þessum bunka ( um...) eru:

Leyfðu mér að segja þér sögu, eftir Jorge Bucay (mjög skemmtileg bók sem gott er að glugga í af og til- svona hálfpartinn sjálfshjálparbók en samt ekki)

Making your mind up, eftir Jill Mansell ( ekta chick- lit sem gaman er að lesa)

Auðnin, eftir Yrsu ( Þóra lögfræðingur stendur alltaf fyrir sínu) 

Rán, eftir Álfrúnu Gunnlaugsdóttir ( les einn og einn kafla,- ekkert of spennt en verð samt að ljúka henni)

Kular af degi, eftir Kristínu Marju ( er að rifja þessa um geðveiku kennslukonuna)

Hálf gul sól, eftir Ngozi Adichie ( alveg mega góð og skemmtileg aflestrar þó hún fjalli t.d. um hungursneyðina í Biafra.......hvað bernska mín var mjög meðvituð um.....ekki henda mat, hugsaðu um börnin í Biafra)

Ég vildi óska að einhvers staðar biði einhver eftir mér, eftir Önnu Gavalda ( fínar franskar smásögur, les svona eina og eina)

Ljóð úr austri ( nauðsynlegt að hafa eina ljóðabók svona til að lesa eitt fyrir svefninn-svefnleysið)

Opinská ævisaga gleðikonu í London e. Belle de Jour ( o.k. viðurkenni að þessari er ég e-lega búin að gefast upp á.......og vitið til að það gerist mjög sjaldan að ég ljúki ekki bókum, síðast var það væmnivellan eftir Jón Kalman sjáið til) 

Kæri Gabríel, eftir Halfdan W.Freihow ( yndisleg bók sem er í raun bréf föður til einhverfs og adhd sonar síns.  Allt litróf tilfinninganna og ég get auðveldlega lifað mig inn í hana og samsamað mig á stundum)

Blaðið sem fékk að vera er auðvitað Educational Leadership ( en ég held að það sé alltaf amk.eitt eintak á náttborðinu hjá mér,- stuttar, aðgengilegar og stórgóðar greinar um skólamál) Þetta tölublað hefur undirtitilinn The positive classroom ( segir allt sem segja þarf) 

 

Nú þarf ég eiginlega að fá svona bókaspá.....en ekki bolla eða spilalestur !!  Hvurnig karakter er ég miðað við lesefni mitt ?

Gott mál

Þetta líst mér vel á....

Sigmundur Ernir í pólitíkina

Madama, kerling, fröken, frú.....

Hef held ég verið þetta allt,- ja kannske ekki madama (- hvað svo sem það er;)

Og flestar konur hafa verið þetta líka !!!  En er kona herra?  Ég veit að ríkisstjórnin hefur margt á herðum sínum núna,- en nú þegar svo margar konur eru ( loksins) í ríkisstjórn er þá ekki mál að breyta starfsheitinu ( það tekur bara 5 mínútur).  E-hvað svo hjákátlegt að segja um Jónínu Leós...ráðherrafrú !!! og um allar þessar flottu konur....ráðherrar.  Sé bara fyrir mér karla með bindi í dökkum jakkalakkafötum.  Þó svo dóttir mín hafi misskilið orðið ráðskona um daginn ( sagan að því kemur hér á eftir) þá legg ég til starfheitið ráðfreyja,- góð vísun í heiðnina okkar ;)  .  Verður reyndar klúðurslegt í framtíðinni að segja Kolfreyja forsætisráðfreyja.......en þarf held ég ekki að hafa áhyggjur af því í ljósi eftirfarandi ummæla dótturinnar !!

Ég sótti hana í vistun um daginn ( þegar allir fréttatímar voru fullir af fréttum af ráðherrum og þinginu).  Hún plammaðist um á inniskóm og stýran í vistuninni segir,- voðalega ertu ráðskonuleg Kolfreyja mín.  Kolfreyja leit á hana og mig....og sagði skýrt,- nei takk, ég ætla sko ekki að vera á alþingi. 

Tók ráðskona sem kvenstarfsheiti ráðherra !!!