Leiðindamál....

...og á versta tíma segir formaðurinn.  Já, voðalega leiðinlegt að við létum líklega múta okkur segir formaðurinn og auðvitað hrikaleg tímasetning á því þegar upp komst um glæpinn svona rétt fyrir kosningar.  Ég vil nú segja að þetta mútumál komi upp á besta tíma svo við kjósendur sjáum hvernig siðferðið er í næstminnsta fjórflokknum og getum kosið eftir því !!

Þingflokkurinn á fundi

Eitt ár

Í dag er eitt ár síðan hún mamma mín dó.  Mér finnst þessi tími hafa liðið hratt og líka hægt.  Enn er ég svona að átta mig á því að eiga hvorki föður né móður á lífi.  Það var öðruvísi að missa mömmu en pabba, aðallega held ég þó að vegna þess að þegar pabbi dó þá höfðum við mömmu.  En eftir að hún dó þá var engin fyrri kynslóð að halla sér að.  Nú erum við bara fullorðna fólkið.  Ég verð samt ævarandi þakklát að hafa átt þau pabba og mömmu í 35 og 43 ár.  Betri foreldra hefði ég ekki getað hugsað mér.

Gæsahúð

Var að koma heim af alveg meiriháttartónleikum á Græna hattinum.  Hin færeyska Eivör Pálsdóttir var ásamt hljómsveit sinni með tónleika og hún tók allan skalann af lögum,- íslenskar ballöður og sín eigin lög bæði á færeysku og ensku.  Ég fékk svo oft gæsahúð að ég hélt að ég væri bara að verða veik,- en það var nú ekki heldur var það rödd þessarar frábæru söngkonu sem hafði svona áhrif á mig.  Mér er gjörsamlega fyrirmunað að skilja hvernig hún fer að því að beita röddinni á svona margvíslegan hátt. Bara geggjað ;)

Merkilegt

hvað þessi blessaði tími líður hratt,- vikan rétt nýhafin en samt komið fram yfir miðja.  Mér finnst ég líka alltaf vera í klippingu,- eða amk litun og nefni nú ekki lapparakstur og lit og plokk.  Tíminn líður svo hratt að ég hef engan tíma til að njóta lífsins án grárra hárra eða nýplokkaðs augnsvips !! 

Og hvað er ég síðan að eyða tímanum í svona bull.....