Lúkas Björn 11 ára

Mér finnst svo sem ekki að það hafi gerst í gær að ég eignaðist hann Lúkas minn Björn,- enda eru 11 ár í dag síðan hann fæddist.  Hann var og er algjört óskabarn.  Við hjónin vorum lengi, lengi búin að reyna að fjölga okkur en ekkert gekk.  Jónas Franklín læknir gerði síðan eggjaleiðaraaðgerð á mér en ári seinna var ekkert farið að gerast ;(  Þá sagði vinkona mín mér að ég ætti að segja á hverjum degi, margoft, að ég væri ófrísk !!  og ég eins og klikkhaus gerði það....tautaði þetta við sjálfa mig aftur og aftur, upphátt og í hljóði.  Og viti konur,- og menn,- ég var ófrísk, (ætlaði náttúrlega ekki að trúa því og gerði amk. þrjú óléttupróf).  Bogi var í Smugunni á þorskveiðum og það var bara hægt að tala við hann í gegnum talstöð.  Til að flytja honum tíðindin varð ég því að tala undir rós.  Við vorum búin að tala saman um nöfn á tilvonandi börn og ákveðin í Lúkas og Kolfreyja.  Ekki gat ég sagt Boga að Lúkas væri á leiðinni því þá hefði hann haldið að Lúkas afi væri að koma heim frá Afríku.  Þannig að ég sagði að Kolfreyja væri á leiðinni...........það kom löng þögn í símann og síðan sagði maðurinn minn....ég er svo glaður.... ( þetta eru sko mestu tilfinningaviðbrögð sem ég hef heyrt frá honum !!).  Og enn erum við glöð,- óendanlega glöð að eiga þennan yndislega gutta. Í gær voru mættir hér 14 jafnaldarar hans og þvílíka fjörið, pizzurnar spændust upp og kökurnar líka og trambolínið var vel notað.