Sylvía og Lúkas

Mér hafa alltaf þótt þessi tvö svolítið lík.

Hérna eru þau Lúkas Björn minn og Sylvía Rún föðursystir hans.  Þau eru amk bæði ljósskolhærð og bláeygð og ansi hreint skemmtileg bæði tvö.

Allt fínt að frétta, brjálað að gera, sem er nú ekki leiðinlegt.  Þakka almættinu fyrir að hafa heilsu, frábæra fjölskyldu, skemmtilega vinnu og vellíðan ;)

skárra en ekkert...

Ingibjörg mælir þó ekki bévítans bullinu bót.  Mér finnst þetta skárra en það,- ástin kannske ekki svo heit hjá henni,- eða bríminn aðeins farinn af............

Ef til vill tilefni til að styrkja faglega ferla

Ástin á stjórnarheimilinu !!

Það er nú meiri ástarbríminn á blessuðu stjórnarheimilinu.  Ég varð alveg ofan dottin þegar ég las í viðtali við iðnaðarÖssur að hann sem pólitískur faðir sem á börn sem eru að vaxa úr grasi renni til rifja þær hörðu árásir sem Þorsteinn Davíðsson sætir út af því einu að hann er sonur föður síns.

Hvað er í gangi,- þau mæla  hvert upp í annað iðnaðarÖssur og menntaÞorgerður. Hverskonar bull og vitleysa er í gangi ? Þegar nokkuð ljóst er að sonur Davíðs fær stöðu vegna þess að hann er sonur Davíðs en ekki hæfastur þá, sem betur fer, heyrist hljóð úr mörgum hornum.  En ég hef svo sem misst af þessum hörðum árásum á Þorstein,- finnst gagnrýnin vera hörð ( en engin árás) á fjármálaÁrna, og algjörlega eðlileg.  

Já, ástin er blind

Afdrifarík skíðaferð??

Dreif mig á þriðjudaginn í fjallið með dótturinni.  Hún nefndi nú svona í framhjáhlaupi að hún kenndi sér smá meins í hálsinum á leiðinni upp í fjall, en svo var það ekkert rætt meir.  Okkur finnst nefnilega svo gaman á skíðum.  Þegar við komum heim um kveldmatarleytið þá lagðist daman upp í sófa og ég bókstaflega horfði á hitann hellast yfir hana.  Þannig að hún er búin að vera með hita og hálsbólgu síðan þá og er enn drusluleg blessunin.  Ég náttúrulega eins og útspýtt hundskinn milli vinnu og heimilis !!!  Nú er gott að hafa fartölvu ;)

Hlutabréf á útsölu !!

Eða hvað,- og kannske bara óveðsett   Í þessu mikla hruni hlutabréfa núna kemur það konu mikið á óvart að megnið af þeim eru veðsett,- þ.e. þeir sem eiga hlutabréfin fengu lán fyrir þeim og skulda enn. Það kemur líka konu mjög á óvart að viðkomandi aðilar hafi ekki baktryggt sig og gert ráð fyrir að það hlyti að koma að því að lækkun yrði á hlutabréfamarkaðnum.  Það er eins og þetta komi öllum gjörsamlega í opna skjöldu núna.  En ég lærði nú einu sinni að það sem fer upp.....kemur niður !!

Málfarsvillur....

...pirra mig oft.  Þó ég sjálf geri örugglega margar.  En mér finnst sjálfsögð krafa að það fólk sem vinnur við fjölmiðla tali rétt og gott mál !!! 

Einn sjónvarpsmann heyrði ég segja....á gamlárdagskvöld,- þetta misbýður málvitund minni ;(    finnst lang eðlilegast að segja gamlárskvöld,- þótt að öllu jöfni segi fólk mánudagskvöld... ( enn og aftur legg ég til að við tökum upp eftir frændum vorum í Færeyjum og segjum mánakvöld...).

Og annar sjónvarpsmaður fór nú alveg með það þegar hann spurði ljósmóður að því hvort fólk kæmi ekki víðs vegar að til að fæða börn á sjúkrahúsinu.  Fólk fæðir ekki börn heldur eingöngu konur,- hingað til amk. Hitt er allt annað mál að fólk eignast börn,- en klárlega fæðir ekki næstum allt fólk börn. 

Ég veit, ég veit...þetta er algjör tittlingaskítur,- en fer í pirrurnar á mér........

Tíminn strax byrjaður....

.....að fljúga. Bogi farinn á sjó,- Kjartan, Vrony og Patrekur farin suður á land og við þrjú eftir í kotinu.  Berjumst við að snúa sólarhringnum við ;(  Ekki auðvelt fyrir b-fólkið sem við öll erum sem eftir eru á heimilinu.  Ég er þó búin að vinna í tvo daga og viðsnúningurinn gengur þokkalega,- veit ekki hvernig verður með blessuð börnin að vakna kl. 7 í fyrramálið................og síðan er strax helgi og þá rúllast þetta amk hálfa leið til baka. 

Loksins, loksins

fékk ég á baukinn í skaupinu.  Búin að bíða milli vonar og ótta í mörg ár,- fæ ég á baukinn, fæ ég ekki á baukinn.  Hef greinilega aldrei verið þekkt fyrir neitt nógu mikið amk til að fá á baukinn í skaupinu.  Fyrr en nú, ásamt ykkur hinum kæru bloggfélagar ;)

Garmlárskveld fínt, risakjúllinn gómsætur og allt meðlæti, fínar rakettur, gott kaffi og góður konni. Og yndislega gott ból..............

Í fyrsta skipti held ég að við Bogi höfum haldið áramótin eingöngu með okkar fjölskyldu,- bara við, börn, barnabarn og tengdabarn !!  Mjög fínt. 

Ólína vinkona eignaðist risa stúlku í nótt,- þetta hafa verið skemmtileg áramót hjá þeim ;)  Til lukku elsku fjölskylda.

Síðasta ár afskapalega rólegt hjá mér,- ekki mikið um breytingar.  Ætli það sé merki um að kona sé orðin öldruð og ráðsett??

Forvitnilegt að vita hvað 2008 ber í skauti/skaupi sér, hafið góðar stundir.